Þann 6. júní fór fram hátíðleg útskrift 10. bekkjar Setbergsskóla. Alls luku 45 nemendur grunnskólanámi að þessu sinni – frábær hópur sem hefur þroskast, vaxið og lagt sig fram á fjölbreyttan hátt á síðustu árum.

Í ræðu skólastjóra kom fram hve mikilvæg þessi tímamót eru – þar sem nemendur kveðja grunnskóla og hefja nýjan kafla í lífi sínu. Minnt var á að heimurinn sem þau stíga inn í sé bæði spennandi og krefjandi, þar sem gildi á borð við virðingu, víðsýni og vellíðan skipta sköpum. Þessi gildi hafa verið rauður þráður í skólastarfinu og eru dýrmætt veganesti út í framtíðina.

Sérstakar þakkir voru færðar umsjónarkennurum, öðru starfsfólki skólans og foreldrum fyrir samvinnu og stuðning á þessari mikilvægu vegferð nemenda. Einnig var minnst á eftirminnilega leiklistaruppfærslu nemenda – School of Rock – þar sem hæfileikar og lífsgleði nemenda fengu að njóta sín. Við í Setbergsskóla erum stolt af útskriftarnemum okkar og óskum þeim farsældar í því sem fram undan er.

Til hamingju með áfangann, kæru nemendur!